PRABU HIRANYAKASIPU
Hiranyakasipu inggih punika nata ditya negari Alengka ingkang kawitan.
Mataun-taun penjenenganipun tapa ing dhasaring samudra kangge nggayuh kasekten ingkang tanpa tandhing, mboten saged dipunkawonaken titah Tribawana (jagad Mayapada, Madyapada dan Arcapada).
Awit saking genturipun tapa jawata satemah narimah tapanipun lan maringaken panyuwunipun Hiranyakasipu dados titah sekti mandraguna boten saged dipun pejahi titah manungsa lan dewa ugi madal saliring sanjata.
Prabu Hiranyakasipu dados sekti mahambara tanpa tandhing jumeneng nata ing Ngalengka kawitan . Namung emanipun sedaya kala wau malah ndadosaken kumalungkung, adigang adigung, saha ngumbar angkaramurkanipun. Kanthi kadigdayanipun lajeng mbedhah negari Banapura . Prabu Nasa saged dipuntelukaken lan Dewi Nariti, putri Prabu Nasa kapundhut garwa.
Saking Dewi Nariti kasebut mijil putra setunggal putra lan kalih putri, inggih punika nama Banjaranjali, Dewi Kasipi lan Dewi Kistapi. Banjaranjali wujud raseksa dene Dewi Kasipi lan Dewi Kistapi wujud wanita ingkang sulistya ing warna. Katiganipun dados putra mantunipun Sanghyang Brahma. Raden Banjaranjali pikantuk Dewi Bremani. Dewi Kasipi kaliyan Bathara Brahmanatiyasa lan Dewi Kistapi kaliyan Bathara Brahmanayana.
Prabu Hiranyakasipu ngumbar angkaranipun rumaos kirang jembar jajahanipun, satemah ngelar jajahan malih. Penjenengaipun lajeng sekuthon kaliyan Prabu Hiranyawreka, nata negari Kasi kangge ngrabasa negari Medanggili nelukaken Maharaja Sunda (panjalmanipun Sanghyang Brahma).
Campuh perang ageng antawisipun wadya Medhanggili lumawan wadya Ngalengka lan Kasi. Salebetipun paprangan kasebat Prabu Hiranyakasipu lan Prabu Hiranyawreka wekasanipun saged dipunperjaya dening Maharaja Suman (panjalmanipun Sanghyang Wisnu raja negari Medangpura ingkang kasambat Maharaja Prabu Sunda) ingkang memba wujud pengawak Narasinga (manungsa asirah sima). Membanipun punika kangge ngawikani kasektenipun Prabu Hiranyakasipu ingkang mboten saged kawon dening titah manungsa lan dewa tuwin madal saliring bedhama.
Mekaten sekedhik andharan kula ngengingi Prabu Hiranyakasipu, mugi wonten mupangatipun. Wonten lepating cariyos lan kiranging tatakrama ing basa keparenga maringi pangaksama.
Nuwun.
