KAWRUHING KAWASA KAYA DENE WEDHI LAN SAMODRA
(Serat Sekar Jinarwi dening Sri Harto Jati)
Kadapyang-dapyan Prabu Pandu lumebet ing panti usada sabab kenging pusakane Prabu Tremboko aran kyai Kalanadah badal saking saliring usada. Boten dangu Hyang Yamadipati mrepeki nagih janji
Yamadipati : "He Pandu Endhi janjimu, hayo manuta takseret nyawamu kanggo gulang2an ana neraka."
Pandu : "Iya pukulun, Ratu Hastina ora bakal mingkur ing janji, tunggunen anak-anak Madrim karoban lahir dhisik.
Yamadipati : " Iya wus ora ana liyane."
Pandu : " Iya takugemi sabdamu wus ora ana liya, nanging kawruhana pukulun, nggonku ngrebut palungguhane Bathara guru aran lembu Andini tak gawe mider ana kayangan, oleh2 ane taman Gubuk Mandragini dakgawe ora beda Indraloka swargane para dewa kepara luwih pepak ngarcapada bisa ngasorake perbawane Kaendran."
Boten wantawis wedal Dewi Madrim babaran miyos kakung kanthi asma Pinten lan Tansen, Dewi Madrim seda konduran sesarengan Prabu Pandu seda kabancut dewa dados intiping naraka.
Saksurute Prabu Pandu, Adipati Drestarastra, Yama widura tuwin Para Kurawa lan Pandawa kaklempakaken nampi wejangangan dening Mahatma Bhisma :
Bhisma : "Anak-anakku lan putu-putu ngger aja cilik atimu, gedhene pacobane Kawasa Yen tinampa dadi santosa lan dewasa.
Duking jaman Samono pun eyang tau nyolong lembu Andini katur mitraku ratu ing Kusinara, dedongengan mau minangka prasemon kawruh kang kalempit kabesut alus tangeh bisa diwudari kajaba kang duwe lantiping ati.
Mengguh Lembu Andini (sapi wadon) cekake wae kangge pralambang kawruh kang wus kawedar. Mulane kuwasa minangkane saka pangarep2ing sapa kang duwe panjaluk. Disanepakake Lembu Andini bisa nekakake sakehing tetedhan (panganan)
Apa dene uga ingaran lembu utawa sapi iku tegese pengarep arep, anyocokake saka anane kawruh. Awit wong iku nalika isih bocah iku mesti wis duwe panedya supaya bisa oleh sawiji wijine kawruh miturut kebutuhane dhewe dhewe, mula watake bocah wus kudu tatakon sarana tembung iki apa? iki sapa? Iki priye nadyan nganti tuwa.
Mangkana sansaya tansah andremimil anggone takon nganti tekaning pati pisan.
Pacene durung bisa entek pitakone, bab gumelaring kawruh ing jagad iki akehe kaya wedi lan segara.
Sapi uga bisa saka tembung Kibsuka kaprahe WIKU bisa di tegesi wong kang buang kadonyan utawa mungkur saka pakareman dunya amung sumendhe marang Kawasa.
Wiku Kimindama buang kadonyan mimba kidang kena panahe Pandu tegese panah ora beda mimis wetune RASA. Mula wong irunge metune getih di arani mimisen , mingsed mimisen (getih rasa).
Dene punglu/pelor padha di arani mimis marga kagawa saka saka rikate lumarap, nanging senjatane dudu amput ampute.
Sanajan lumaraping cahya pisan kang kawilan rikat dhewe lakune nanging isih kena pinetung ,pepindane kang luwih matis kaya dene wong dijiwit, panjiwite lan rasane lara bebarengan wae iku rikate rasa ngungkuli rikate cahya
Dadi Wiku iku pralambang ditegesi wong kang mungkur saka papaes dunya tansah ngisep isep tumetesing kawruhe Kang Maha Kuasa, kang tekane tanpa antara nyut teka batine. (sapi uga duwe teges kawruh kang pininta, kang dijaluk).
NANDINI tembung wadon yen NANDANA tembung lanang , Andana iku tegese kabungahan, kasenengan. Dadi sapa antuh kawruh utawa andarbeni sawijine kawruh iku uga saperangan kabungahan kang sejati.
Yamawidura : " Rama panemban, kurang Wicaksana Bathara guru kasor dening titahe?"
Bhisma : " Sabab Pandu ora nyembah Bathara Guru, esthine batin Amung marang kang Kawasa kang ora kekurangan sawiji apa, tan kena kita ngapa, ora bisa dipikir ora bisa dikira-kira sabab sakjabaning ukurane kekuatane manungsa . Amung sumarah ing titah nrima ing panduming dumadi memayu Hayuning Bawana."
Sengkuni : " He...he...he...., Dursasana besok yen ana lakon dewa tumurun ana Hastina diapusi wae, kanthi ngapusi iku ora beda ngalahke dewa, He....he......"
Dursasana : " Ha..ha....., Dewane maling Punika Bethara Kartikeya, Dewane gample banthing kucing Punika Bethara Sengkuni.
Bethara Sengkuni menawi dados guru mulange dikonkon merem angen2en sapa sesembahanmu? sesembahanmu apa sing gawe bumi langit, jenenge sapa?.
ha...ha....., bareng melek Ba.. iku mau dudu sesembahan iku pikiranmu, pikir2ane dhewe dijenenge dhewe banjur dijaluki dhewe.....ha.....ha......ha......ha......ha.....ha.....
sing katelah samubarang sakalir iku diwenehi jeneng, dene KAWASA iku Dudu samubarang sakalir..ha...ha.."
Bhisma : " Dursasana, ....Elinga Kawasa iku Maha Esa tegese Tunggal, Yen Eyang ngarani tunggal iku ya siji ya loro ,Dudu siji ya Dudu loro, ya akeh ya embuh, ya duwe Asma ya ora duwe Asma, dadi ora kena dionceki lan ora kena digayuh nganggo pikiranmu
Mangertiya Eyang tansah nyebut Asmane KAWASA sabab sakatahe asma kagungane, sing duwe kawruh kaya Dursasana ya ora kena disalahke, kabeh mau urusan batine dhewe2, aja memalangi marang kawruhing liyan. Sabab KAWASA iku sakarepe dhewe ora kena didhisiki ora bisa candhaki nganggo pikirane Dursasana.
Manungsa amung sendika dhawuh nindakake kodrate KAWASA. Ora ana daya upaya amung KAWASA kang duweni.
Sing menehi Dursasa tukul duwe pikiran kaya mangkono mau tukul karepe dhewe apa ditukulke dening Kawasa?
Manawa kapitayane pun Eyang tansah nyebut Asmane Kawasa datan kendat rina lawan wengi jalari tansah eling marang Kang Maha Kawasa."
Yamawidura : " Inggih jagad mawarni-warni boten jomplang, beda2 kapitayan sageda dados kekiyatan karukunan. Boten wonten critanipun Hastina congkrah sabab rebut bener awit batin punika urusane pribadi, ingkang ngraosaken atine dhewe2 (menghayati) .
Kula tansah nyebut asmane Pangeran jalari saged damel gumolonging cipta, nyawiji dhateng samukawis ingkang badhe dipun tandhangi boten malang tumoleh, teteg, mantep saged mrantasi karya."
Wasana menawi wonten ukara ingkang boten mranani dhiri kula nyuwun agunging pangampunten.
