JEJER KAHYANGAN SURALAYA WAYANG PURWO

JEJER KAHYANGAN SURALAYA WAYANG PURWO

Saking : Janturan Jangkep Wayang Purwo

 

Aoum awignam Astu.

 

Swuh rep data pitana

Sesanti yekan trustha manah bathara humuwus, tatan kredha wara karana digdaya, mangkana ujaring kekawin paramayoga ingkang werdine pangejawantahing bathara luhung yekti paring nugraha kinarya memayu rahayuning bawana.

Tulusing pangesti sembada dadya pambuka, murwakani carita saratri, anenggih punika gumelaring kahyangan Suralaya inggih sinebat Ujung Giri Kaelasa, Ngondar-andir bawana, Jonggreng Salaka, ugi sinebat Paku Jamur Kataliwarna.

 

Pramila sinebat Suralaya minangka pratandha jagading kasukman ingkang wus hangancik ing tataran jiwa luhur. Ujung giri Kaelasa mengku werdi sasana pangasrepan dadya sarana nedahaken keblating panembah. Awasta Ngondar-adir bawana tegesipun jagad pamuja. Jonggreng Salaka minangka pratandha kalamun ing mriku sinung pepasren cahya sumorot kadya salaka binabar. Paku Jamur Kataliwarna lire dadya sasana paugeraning pangesthi.

 

Kahyangan Suralaya dumunung aneng pucaking haldaka Himalaya inggih awasta wukir Tengguru. Lamun kadulu hamung katingal salju labet datan kawistara sinawang sarana netra walaka. Dupi sinawang sarana manthenging pangesthi nenggih socaning pramanajati, ing mriku katingal pepasren sramaning jawata ingkang awasta jagad Suranggangkara. Apa ta pepasren hing Suralaya ? anenggih Bale Paparyawarna kinarya sasana sewaka awasta bale Asmarakata. Madyaning bale sinung palenggahan awasta dhampar Padmasana Selakandha Warubinangun. Ngajenging bale Paparyawarna rinengga pendhapi awasta

Marcukundha. Kori dwaraning Kahyangan awujud sola gilang rinengga taludhangan Andha rante, awasta kori Sela Matangkep ingkang siang ratri tinengga yaksa kembar bathara Cingkarabala tuwin Bathara Balaupata. Kanan kiringing kori sinung gapura winastan gapura Merutulya. Pendhapi sramaning wadya awasta Pagelaran Kandhawaru.

Bacira kinarya hanggladhi olah kaprajuritan sinebat Repat Kepanasan ingkang ngajengaken harga Jamurdipa. Tamansari kang hangrenggani sasana widodari winastan Taman Tejamaya. Saking harga Jamurdipa tumekeng bacira winatesan jurang awasta Wedhung Pangarib-arib rinengga uwot awasta uwot ogal-agil. Sasana pasiksan tuwin dahana panyuci awasta Kawah Candradimuka ingkang dhasarira sinung endhut mawa aran Endhut Blegedaba. Bale pringgitan karengga ganosa kadewatan awasta gangsa Lokananta. Para hapsari ingkang hangladosi upacara kadewatan cacah sapta nenggih Bathari Supraba, bathari Wilutama, bathari Lenglengmandanu, bathari Irim-irim, bathari Gagarmayang, bathari Tiinjungbiru tuwin bathari Warsiki

 

Lah sinten ta ingkang dadya tetungguling para jawata Suralaya? wewisik Sanghyang Guru, Jagatpratingkah, Hywang Girinata, Hywang Jagadnata, Hywang Hutipati, Hywang Lengin, Hywang Nilakantha, Hyang Pramesthi. Randhuwanda, Hywang Samba, Hywang Caturboja. Adityanirmala. Hywang Bhirawa, Hywang Dewaesa, Hywang Dewaraja, Hywang Isyaka, Hywang Mahabudha, Hywang Budhasatwa, Hywang Manikmaya, Pasuprabu, Hywang Syiwa, Hywang Rudra inggih wewisik Sanghywang Wisesa.

 

Pramila wewisik Sanghywang Guru karana dadya panutaning panembah sanggya titah pujangkara, Hywang Jagad pratingkah, Jagad karana inggih Jagadnata labet wenang hamurwani gumelaring pranatan ing jagad raya tirta wenang hamurba isining bawana. Girinata mengku werdi nguwasani gunung ing ngarcapada. Hutipati mengku werdi wenang murba klawan misesa. Hywang Lengin dadya pepenget lamun sukunira apus sajuga. Nilakantha sinung tandha belang tenggokira labet hanginum wisa paekane Ditya Calakutha duk nalika para dewa damel Repatkepana san. Hywang Pramesthi mengku ratuning tribawana. Randhuwanda karana darbe, siyung kencana. Wewisik Hywang Samba, kalamun sumeh wedanane katingal bagus hangungkuli bathara Kamajaya.

Caturboja karana darbe asta cacah sekawan. Adhityanirmala kawasa paring waluya titah pujangkara kang nandhang wiyodi. Bhirawa pangwasanira lumuh kaungkulan. Wewisik Dewaesa dadya rajaning para jawata. Pramila wewisik Hyang Isyaka karana hangratoni para hapsari. Manikmaya mengku werdi dumadi saking kuninge hantiga mahadwipa. Wewisik Hywang Purwakandha wenang hamurwani lelakon ing jagad raya. Pramila wewisik Hywang Rudra, darbe kemayan lamun winateg dadya brahala trinetra.

 

Sanghywang Guru hangasta pusaraning kadewatan adhedhasar adil paramarta. Lampahing pengadilan nindakaken dana wesi asat lire datan hambahukapine. Nora mawas hapsara, widadara, dewa Durhandara menapa titah pujangkara, kalamun gedhe lelabetanira yekti ginanjar jumbuh klawan lelabuhane, nadyan garwa putra lamun mangro panembahe binasakaken merong kampuh jingga, yekti kapatrapan pidana sabobot klayan pakartinira. Lamun kacaritakake luhuring kawibawan hing Suralaya yekti sedalu datan ana pedhote. Pinunggel ingkang hawi carita, anyarengi hari Soma Hywang

Jagad Girinata kepareng miyos siniwaka wonten bale araras Marcukundha, lenggah dhampar awangun sela kandha waru binangun, sesemek premadani pinulas jingga ginambaran sekar tanjung. Sinebaran durgandana urap sari ginanda wida, kongas mangambar gandane temah hangebeki jroning sasana sewaka.

 

Tedhaking pukulun Hywang Manikmaya kahayap para widodari kasapta ingkang samya hangampil upacara kadewatan nenggih kayu Klepu dewandaru, gedhang mas pupus cindhe, debog swasa, pari jatha kencana, sekar mayang sarwa retna, lombok terong isi mutyara miwah hangasta dhaharaning para dewa arupi jambu Dipanirmala tuwin pelem pratanggajiwa. Lah sinten ta punika ingkang kepareng caket denira mangarsa? muhung kamituwaning Kahyangan Suralaya nenggih jawata saking Sidik Pangudal-udal wewisik Hywang Naradha ya sang Narada dadi, Hywang.

 

Kanekaputra, Kanwaka Resi, Resi Nggana inggih Hywang Kanekasabda, watak Resi inggih wewisik Hyang Dewa Resi. Hywang Naradha kinarya paranpara labet wuspana dhateng osiking bawana, lantip ing panggrahita turta datan keweran dhateng laksitaning jagad gumelar. Denira dadya paranpara hamarsudi dhateng wataking brahmana lire tansah hamemangun karya nak tyasing sasama nuwah hamerhayu dhateng rahayuning tumitah.

 

Sumambung ing wuntat anenggih punika pisowanira putra saking kahyangan Indraloka wewisik Sanghyang Indra, Bathara Surapati. Hywang Sakra inggih wewisik Resi Upadya. Lenggah mabukuh hamarikelu temah katingal konjem wedanane. Ing njawi tinon andherpati sanggya dewa Durandara watak nawa ingkang samya hanggantung seba, kalamun cinandra yayah ombaking jaladri hanempuh pesisir. Abra markata busanane para jawata watak nawa kadya panjrahing puspita hingTinjomaya.

 

Rep sidhem premanem tan ana jawata nyabawa. Ingkang kapyarsa muhung swantening gangsa Lokananta ingkang tinabuh para Gandarwa, munya gendhing Kawit kabarung swarahanggana nyekar hangrangin, nora saru kepara akarya senen jroning panangkilan.

 

Sireping gendhing suwuking gangsa Lokananta, gya kapireng swantening guntur jumalegur munya hing ngakasa, punika dadya pratandha kalamun Sanghywang Jagad Girinata wus arsa paring sabda. Durhandara ingkang sumewa katingal hangangseg nedya hanampi sabdaning Hywang Jagad Karana, mangkana wijiling sabda Hywang Guru ingkang kawiyos

 

 

Imajner Nuswantoro