Prabu Destarastra Gugur
ꦥꦿꦧꦸꦣꦼꦱ꧀ꦠꦫꦱ꧀ꦠꦿ ꦒꦸꦒꦸꦂ
Pinangka wong tuwane Sata Kurawa Destarastra kalebet tokoh wayang ingkang kondhang. Ananging babagan guguripun Sang Destarastra sanes dhalang beda beda.
Ingkang kula sumerapi wonten tigang sanggit.
1. Gugur wonten lakon Kresna Dhuta. Nalika Kresna tiwikrama amargi dipunbujung Kurawa, Destarastra kaliyan kang garwa Gendhari kebrukan beteng lan dipunidak idak Sata Kurawa putrane dhewe tumekane gugur.
2. Gugur wonten lakon Pandhawa Boyong. Nalika Pandhawa boyong dhateng Astinapura saksampunipun prang agung Barata Yudha. Amargi linsem ingkang dipungrayah kanthi aji lebur sekethi sanes Werkudara, Sang Destarastra lan Gendhari tumuli mlajeng winten alas. Kejegur jurang kang andhapipun alas kobong. Destarasta gugur wonten ngriku.
3. Gugur wonten lakon Aswatama nglandhak. Wonten ngriku Destarastra gugur kanthi lampus dhiri.
Senajan beda sanggit, ananging sami babagan guguripun. Gugur kanthi mboten wonten pabaratan.
Gugur ina.
Jumbuh kaliyan sumpahipun nalikane gumantos Kang rayi Pandhu nyepeng panguwasa Astinapura.
Lamun mblenjani lila mati nistha.
Mangga menawi sisip dipunsaruwe.
Aksara Jawanipun :
ꦥꦿꦧꦸꦣꦼꦱ꧀ꦠꦫꦱ꧀ꦠꦿꦒꦸꦒꦸꦂ
꧋ꦥꦶꦤꦁꦏꦮꦺꦴꦁꦠꦸꦮꦤꦺꦱꦠꦏꦸꦫꦮꦣꦼꦱ꧀ꦠꦫꦱ꧀ꦠꦿꦏꦭꦺꦧꦺꦠ꧀ꦠꦺꦴꦏꦺꦴꦃꦮꦪꦁꦆꦁꦏꦁꦏꦺꦴꦤ꧀ꦝꦁ꧉ꦄꦤꦔꦶꦁꦧꦧꦒꦤ꧀ꦒꦸꦒꦸꦫꦶꦥꦸꦤ꧀ꦱꦁꦣꦼꦱ꧀ꦠꦫꦱ꧀ꦠꦿꦱꦤꦺꦱ꧀ꦝꦭꦁꦧꦺꦣꦧꦺꦣ꧉
꧋ꦆꦁꦏꦁꦏꦸꦭꦱꦸꦩꦺꦫꦥꦶꦮꦺꦴꦤ꧀ꦠꦺꦤ꧀ꦠꦶꦒꦁꦱꦁꦒꦶꦠ꧀꧈
꧋꧇꧑꧇꧉ꦒꦸꦒꦸꦂꦮꦺꦴꦤ꧀ꦠꦺꦤ꧀ꦭꦏꦺꦴꦤ꧀ꦏꦿꦼꦱ꧀ꦤꦣꦸꦠ꧉ꦤꦭꦶꦏꦏꦿꦼꦱ꧀ꦤꦠꦶꦮꦶꦏꦿꦩꦄꦩꦂꦒꦶꦣꦶꦥꦸꦤ꧀ꦧꦸꦗꦸꦁꦏꦸꦫꦮ꧈ꦣꦼꦱ꧀ꦠꦫꦱ꧀ꦠꦿꦏꦭꦶꦪꦤ꧀ꦏꦁꦒꦂꦮꦒꦼꦤ꧀ꦝꦫꦶꦏꦼꦧꦿꦸꦏꦤ꧀ꦧꦼꦠꦼꦁꦭꦤ꧀ꦝꦶꦥꦸꦤꦶꦣꦏ꧀ꦆꦣꦏ꧀ꦱꦠꦏꦸꦫꦮꦥꦸꦠꦿꦤꦺꦣꦼꦮꦼꦠꦸꦩꦺꦏꦤꦺꦒꦸꦒꦸꦂ꧉
꧋꧇꧒꧇꧉ꦒꦸꦒꦸꦂꦮꦺꦴꦤ꧀ꦠꦺꦤ꧀ꦭꦏꦺꦴꦤ꧀ꦥꦤ꧀ꦝꦮꦧꦺꦴꦪꦺꦴꦁ꧉ꦤꦭꦶꦏꦥꦤ꧀ꦝꦮꦧꦺꦴꦪꦺꦴꦁꦣꦠꦺꦁꦄꦱ꧀ꦠꦶꦤꦥꦸꦫꦱꦏ꧀ꦱꦩ꧀ꦥꦸꦤꦶꦥꦸꦤ꧀ꦥꦿꦁꦄꦒꦸꦁꦧꦫꦠꦪꦸꦣ꧉ꦄꦩꦂꦒꦶꦭꦶꦤ꧀ꦱꦺꦩ꧀ꦆꦁꦏꦁꦣꦶꦥꦸꦔꦿꦪꦃꦏꦤ꧀ꦛꦶꦄꦗꦶꦊꦧꦸꦂꦱꦼꦏꦼꦛꦶꦱꦤꦺꦱ꧀ꦮꦼꦂꦏꦸꦣꦫ꧈ꦱꦁꦣꦼꦱ꧀ꦠꦫꦱ꧀ꦠꦿꦭꦤ꧀ꦒꦼꦤ꧀ꦝꦫꦶꦠꦸꦩꦸꦭꦶꦩ꧀ꦭꦗꦺꦁꦮꦶꦤ꧀ꦠꦺꦤ꧀ꦄꦭꦱ꧀꧈ꦏꦼꦗꦼꦒꦸꦂꦗꦸꦫꦁꦏꦁꦄꦤ꧀ꦝꦥꦶꦥꦸꦤ꧀ꦄꦭꦱ꧀ꦏꦺꦴꦧꦺꦴꦁ꧉ꦣꦼꦱ꧀ꦠꦫꦱ꧀ꦠꦒꦸꦒꦸꦂꦮꦺꦴꦤ꧀ꦠꦺꦤ꧀ꦔꦿꦶꦏꦸ꧉
꧋꧇꧓꧇꧉ꦒꦸꦒꦸꦂꦮꦺꦴꦤ꧀ꦠꦺꦤ꧀ꦭꦏꦺꦴꦤ꧀ꦄꦱ꧀ꦮꦠꦩꦔ꧀ꦭꦤ꧀ꦝꦏ꧀꧈ꦮꦺꦴꦤ꧀ꦠꦺꦤ꧀ꦔꦿꦶꦏꦸꦣꦼꦱ꧀ꦠꦫꦱ꧀ꦠꦿꦒꦸꦒꦸꦂꦏꦤ꧀ꦛꦶꦭꦩ꧀ꦥꦸꦱ꧀ꦝꦶꦫꦶ꧉
꧋ꦱꦼꦤꦗꦤ꧀ꦧꦺꦣꦱꦁꦒꦶꦠ꧀ꦄꦤꦔꦶꦁꦱꦩꦶꦧꦧꦒꦤ꧀ꦒꦸꦒꦸꦫꦶꦥꦸꦤ꧀꧈ꦒꦸꦒꦸꦂꦏꦤ꧀ꦛꦶꦩ꧀ꦧꦺꦴꦠꦺꦤ꧀ꦮꦺꦴꦤ꧀ꦠꦺꦤ꧀ꦥꦧꦫꦠꦤ꧀꧈
ꦒꦸꦒꦸꦂꦆꦤ꧉
꧋ꦗꦸꦩ꧀ꦧꦸꦃꦏꦭꦶꦪꦤ꧀ꦱꦸꦩ꧀ꦥꦲꦶꦥꦸꦤ꧀ꦤꦭꦶꦏꦤꦺꦒꦸꦩꦤ꧀ꦠꦺꦴꦱ꧀ꦏꦁꦫꦪꦶꦥꦤ꧀ꦝꦸꦚꦼꦥꦼꦁꦥꦔꦸꦮꦱꦄꦱ꧀ꦠꦶꦤꦥꦸꦫ꧉
꧋ꦭꦩꦸꦤ꧀ꦩ꧀ꦧ꧀ꦭꦼꦚ꧀ꦗꦤꦶꦭꦶꦭꦩꦠꦶꦤꦶꦱ꧀ꦛ꧉
ꦩꦁꦒꦩꦼꦤꦮꦶꦱꦶꦱꦶꦥ꧀ꦝꦶꦥꦸꦤ꧀ꦱꦫꦸꦮꦺ꧉
ꦆꦩꦗꦶꦤꦺꦂꦤꦸꦱ꧀ꦮꦤ꧀ꦠꦺꦴꦫꦺꦴ
Imajiner Nuswantoro
