RATU IKU YEKTI NETRA BATHARA
(Serat Sekar Jinarwi dening Sri Harto Jati)
Kacarios Prabu Parikesit muksa kauntapaken dinilat dening Sang Hyang Basuki (ula putih), prabu Yudayana klintu pandugi, murina ing galih banjur arsa ningkes sakahing sarpa. Kadherekaken patih Danurwenda tumuju ing hastana Gadamadana sakehing sarwer-sarwer alit tuwin ageng sirna dipun tamani jemparing kyai Roda dadali. Sasampunipun gusis sato kewan kang awujud sawer ing papan mriku, sang prabu arsa tedak wonten ing gunung Mahendra (gunung Lawu).
Alas-alas kang ana ing gunung Mahendra dipun besmi mawi jemparing Bramastra ludes keles kang sarpa lan naga, sapandurat sang prabu ningali wanodya lumajar tumuli dipun purugi dumugi ing pertapanipun Begawan Nagasarana. Gelise carita prabu Yudayana kadaupaken kaliyan Dewi Srani putrinipun sang resi. Nuli sang wipra paring wejangan :
Begawan : "Angger kula ngaturi pemut dhateng Panjenengan Nata, teka badhe nglanturaken karsa boten prayogi, dados sanget pangowel kula dhateng anak prabu, pepeling kula makaten :
Punapa wonten sang nata binathara angrusak wewengkone piyambak, mangka ingkang sami kagem nata ing kina-kina, bebasan ratu punika anguripi wong Kapidana pati, ambungahake wong kasusahan, paring teken dhateng tiyang kang kaluyon, paring tedha dhateng tiyang kang kaluwen, paring nginum dhateng tiyang ingkang kasatan makaten ingkang sampun kalampahan
Ingkang rama kauntapaken dening naga Basuki cobi sinten ingkang dados titisane naga basuki? boten wonten sanes ingkang eyang prabu Baladewa rumuhun. Sasekti-sektine ula punika tasih sekti manungsa, manungsa saged nyipta dados brahala, gajah, naga,..saciptane dadi. Katelah Aji Gineng kinarya pralampita manungsa punika ratu-ratune naga tuwin sato kewan."
Yudayana : "Rama panembahan, ana kandha kudu ana tandha, ana yekti kudu ana bukti Yudayana penging anyumerepi."
Begawan Naga Sarana triwikrama dados naga sirahe sundul ing angkasa pethit ambles ing bumi, Yudayana nyungkemi pada, sang resi tumuli rucat bramantya kados uni-uni.
Begawan : " Kulup Yudayana, ing piwulang kene naga iku manawa aksara carakan mratelakake angka na = 2, ga = 1. ("Na", "Ga") ateges sipat wenang lumrahe wong-wong kuna ing desa ngarani kur-kuran yaiku amung sadrema. Sarana tegese srana pangayuh bisa kanti gladi murih lahir batine bisa tumata lan tentrem, MENENG, WENING, DUMUNUNG.
Meneng iya menengake raga kang kaprabawa dening napsu, wening iku weninge pikir, ngedohake gagasan sing tumuju marang tindak sing ora perlu lan ora utama, temah dumunung ana pusarane gegayuhan. Jiwa raga sakojur gumolong gilig dadi siji ngadepi panjumbuhan kang pratitis nganti bisa kalakon. Laku kudu pakulinan ajeg sawanci anaparigawe bisa diecakake titis lan tatas.
Surasane ngelmu bisa medhar wewadini jagad akeh sing kasengsem kenthir ing daya bisaha nyakup sakabehe isine wiwit " Ha" nganti "Na". Sing kaya mangkono iku jalari kurang pramaneming pangudi susurupan banjur ngrambyangan wae, kebat kliwat. Iku marga saka kapiluyune. Malah marga saka kayungyun lan kasusu nganti lali weweka. Ana ngendhi ujare tansah ngelmu wae, ora ngemuti marang kahanan, empan lan papan sarta wewalere. Ilang kaprayitnane batin, ninggal pepacuh endhi sing KENA endhi sing ORA kena di wedharake. Lekase kaya wong guru aleman , kepengin diarani sugih ilmu pinter olahing batin.
Tindak kang kaya mangkono iku bebayani lan ora prayogi kanggo dhiri pribadi uga ana sikune Hyang Widhi. Mula kulup anak prabu kudu bisa ngetrapake surasane ngelmune lan kawicaksanan, tindak tanduk lan muna muni kudu bisa tinata "
..........................................................................................................
Catetan = jemparing Harda dedali punika senjata kagungan pangrahita/ rasa pangrasa.
Roda dadali punika panah boten kagungan rasa pangrasa tekad nindakaken kuwajiban tanpa pilih kasih.
Wasana menawi wonten ukara ingkang boten mranani dhiri, kula nyuwun agunging pangaksami
