Raden Brajasena
Raden Brajasena/ Bajradenta/ Jayengsena, punika putranipun Raden Gathutkaca ingkang kadadosan saking kamanipun Raden Gathutkaca ingkang dhawah wonten ing bantala awit mbopong Dewi Sitisundari nalika lampahan Ranjapan. Wusanane kama kapuja dados bayi lan kapupu dening Bathara Antaboga.
Raden Brajasena medal wonten lampahan Baladewa muksa, nalika Brajasena badhe ngawu-awu sudarma, nagari Ngastina lan Dwaraka nembe perang lawan bala Trajuwingit/Trajutrisna awit Prabu Sawarka (R. Antawirya, putra Bomanarakasura) mbalela badhe males ukum pejahe ingkang rama. Nalika semana Raden Brajasena njedhul saking bantala wonten sangajenging Prabu Baladewa. Dipunkinten salah satunggaling mengsah, Raden Brajaswna kapejahan dening Prabu Baladewa. Wusana layonipun Raden Brajasena dipunwaluyakaken dening sukmanipun Prabu Kresna.
Sak sampunipun Prabu Kresna nerangake asal-usulipun Brajasena, Brajasena lajeng dhinawuhan supados nyirnakaken mengsah ingkang mbalela. Wekasan Prabu Sawarka saged kapejahan dening Raden Brajasena.
Menawi miturut naskah lampahan Renggabumi (Setyaka-Setyaki muksa) koleksi Museum Sonobudoyo, Raden Brajasena katelah kanthi nami Raden Jayengsena. Namung kemawon ingkang damel ontran-ontran sanes Prabu Sawarka nanging Prabu Renggabumi utawi sukmanipun Prabu Bomanarakasura piyambak. Ingkang anggesangake Jayengsena nalika dipejahi Prabu Baladewa ugi sanes sukmane Prabu Kresna nanging Bathara Antaboga.
Menawi wonten cariyos gagrag Yogyakarta mbok menawi paraga Brajasena meh sami kaliyan Suryakirana, putranipun Gathutkaca ingkang kadadosan saking ari-arinipun Jayasumpena lan kapuja dados bayi dening Bathara Baruna. Namung kemawon, menawi wonten mriki Suryakirana menika paraga ingkang "nakal" awit dipunbujuki dening Wesiaji (putra Gathutkaca ingkang watak angkara awit katitisan sukmane Dursala) lan badhe njongkeng dhampar Nagari Ngastina. Wekasan Suryakirana kapejahan dening Prabu Baladewa.
Imajiner Nuswantoro
