JANTURAN BETHARI DURGA
Teleng ing wana kredhayana ana waringin putih jajar sanga tuwin randhu alas jajar pitu, tinengeran sela gilang sak gubuk penceng gedene.
Hanenggih ing mriku dunung ing kaswargan setra anggandha mayit inggih ing dhandang mangore, gawat kaliwat wingit kepati bebasan sato mara sato mati jalma mara bali mung gari aran.
Apa ta darunane mangkana, awit inggih ing mriku dhangkaning para dubriksa baju barat jim setan pri prayangan ilu ilu banaspati gandarwa myang brekasakan datan kantun guna dhudhuk tenung santet teluh braja myang bondhet pilut sadaya samya harereton ing dhandang mangore, sinung hambeg drengki srei dahwen panasten pati open jail metakil dhemen mulad pasulayan, sirik mring karahayon pramila datan nama mokal lamun wus ngancik serap surya jroning wana ketingal singup sasawangan remeng remeng hangregemeng ,sela gung pating jenggeleng jinajaran wreksa geng hanggengeng kinemulan gegodhongan hanggameng katingal cemeng, ing ngandhap katon rungkut labet keteling glagah tuwin kalanjana jinangkepan kang sulur waringin hamulet nglawer pating saluwir, katempuhing angin krembyah krembyah yayah rikmaning yaksa hanggegirisi.
Kumrosak kaleyang kabuncang kumandhang swaraning grojogan maweh daya geter jroning wana, waneh waneh sabawaning peksi kang sobeng ratri kolik tuhu myang kokok beluk bilulungan luru memangsan, singa hanggemprong srenggala hambaung binarung taksaka hangakak sinusul panjerite wraha tinubruk sardula.
Ing tata gelar wujud wana wasa ananging tuhu punika kahyangan kedhatoning dewa panggodha pangrencana ingkang hawewisik pandya batari durga inggih hyang pramuni, duk ing uni widodari suralaya ingkañg nandhang kalepatan temah kenging sotipun hyang jagad nata, temah sirna sulistyaning warni salin rupa ganti slaga apepaes raseksi hanggegirisi ngisis siyung netra mencorong grana mungal wadana abrit hambregadag kaya kembang wora wari.
Inggih hyang pramuni puniku ingkang hangratoni para wadya baju barat lelembut sukma sasar myang kama salah ingkang sedaya kajibah hanggodha hangrencana gegayuhaning titah ingkang hambeg utami.
Nuju hari sukra petak wancine wus madya ratri pandya batari durga kepareng lenggah munggweng sela kumalasa hasesemek roning rajamala kahadep para abdi setan janggitan wedon jrangkong waru dhoyong engklek engklek balung atandhak gendruwo myang wewe gidrah, beg hamber hambalabar ugi sampun ketingal sowanipun para anung anung tetindih ing wadya drubiksa ditya kala tenung teluh braja jaramaya yamaraja palasiya yasilapa buta dhengen tuwin lara dhingin,
Lenggahira sang batari sinongsongan sutra jingga cinawi kencana cinawisan pagantenan dalah pakecohan , datan kantun padupan geng kumendheng hangobar menyan ratus kukusira hangebegi sasar sinawung ganda arum mangambar rumabasing durgandana.
Dereng dangu lenggahira pandya batari katungka siwanira ingkang putra narendra tunggul malaya prabu dewa srani, sowan mangarsa kang ibu lampah dhodhog hangeka pada repepeh repepeh pindha sata hametarangan, dupi wus caket gya mangsah sumembah sigra lenggah susilarja wadana tumungkul yayah konjema ing bantala, sowanira sang nata tunggul malaya hanganti wadya raseksa tanpa wicalan pating glereng pating glero pating prengangah pating prengongo, buta gimbal buta ijo buta bajang buta gundul myang buta pengung pating galidrah yayah gerah kapat ing mangsa labuh, sapandurat sang betari dereng kepareng paring sabda pangandika hamung ketungkul mandeng citrane kang putra katon kasoking sutresna ngantya legeg jroning wardaya.
Meniko janturan ing dhandhang mangore para kadhang sutresna budaya. Sugeng kesaenan sedaya, mugi manggih karahayon sedayanipun
